Klima Larrialdia – Abenduak 1ean, Donostian

Extintion Rebellion, FridaysForFuture, GreenPeace, Balazta, Haritzalde eta Kalapiek Bizi Martxa bat antolatu dugu, klima aldaketaren larritasun egoera salatzeko eta klima-aldaketa geldiarazteko neurri serioak hartzea agintariei eskatzeko. Bizi-martxa abenduaren 1ean aterako da goizeko 11:00etan Alderdi Ederretik Antiguoraino joan, Grosera ondoren, berriz Alderdi Ederrera itzultzeko. Adin guztietako pertsonak parte har dezaten pentsatuta dago, eta konkretuki, adin txikikoak eta gazteak parte har dezaten nahi dugu, martxa 2 soundsystem-ek jarraituko dute eta musikatua eta alaia izango da. Zeuen bizikletak hartu eta masiboki parte hartzeko gonbitea luzatu nahi dizuegu! Inoiz ikusi ez den partehartzaile kopuru handiena ikusi nahi dugu gure kaleetan zehar bizikleta gainean!

 #BiciMartxa #klimaLarrialdia

Jarraian gure manifestua irakur dezakezue:

2019KO ABENDUAREN 1EKO TXIRRINDULARI-MARTXA.

Parisko Akordioaren mezuaren, Nazio Batuetako adituen (IPPC) txostenaren eta Espainiako gobernuak klima-aldaketari aurre egiteko hartu duen konpromisoaren arabera, 2100erako, berotze globala 1,5 gradura mugatu beharko dugu.

Horretarako, mundu osoko gobernuek errotikako eta premiazko erabakiak hartu behar dituzte, gure eguneroko bizitzaren alderdi guztietan aurrekaririk ez duten aldaketa sakonak eragingo dituztenak.

Gure hirian, batik bat motordun ibilgailuen ondorioz, berotegi-efektuko gasek (BEG) gora egin dute. Hortaz, Donostiako Udalari eskatzen diogu klima-larrialdi egoera deklaratzeko, inguruko beste hiri batzuek egin duten bezala.

Bada, 2050erako, salgaiak eta pertsonak garraiatzen dituzten motordun ibilgailuek sortutako berotegi-efektuko gasen emisioa zerora murrizteko neurri zorrotz eta urgenteak hartu beharko ditu Udalak.

BIZIKLETA + AUTOMOBIL – = OSASUN +

Espainiako hirietan, batez ere motordun ibilgailuen zirkulazioaren ondorioz, airearen kalitate txarra errepide-istripuak baino 20 aldiz hilkorragoa da. Horregatik, autoek gure hirietan dituzten espazioak eta pribilegioak murriztea eskatzen dugu.

Bizitzeko hiriak eta oinez ibiltzeko kaleak behar ditugu, eta hainbeste autorekin hori ezinezkoa da. 

Hortaz, mugikortasun iraunkorra (kutsatzen ez duena) eta osasungarria (kea arnasarazten ez duena) bultzatu behar ditugu.

Bizikleta garraiobide iraunkorra izaki, espazio propioa merezi du mugikortasun-planetan. Bidegorri-sarea zabaldu egin behar dugu eta aparkaleku gehiago jarri behar ditugu hiriko puntu estrategikoetan, bizikletak mailegatzeko zerbitzu publikoa zabaltzeko.

Eguneroko joan-etorrietan bizikleta erabiltzeak osasuna eta bizi-kalitatea hobetzen lagunduko digu.

MUGIKORTASUN-PLANA: 10-20-30 hiria

Autoen abiadura gutxitzen badugu, poluzioa (emisioak) eta harrapatuta hildako pertsonen kopurua drastikoki murriztuko ditugu. Horregatik diogu mugikortasun-plan estrategiko bat diseinatu behar dugula, Gasteizko plana erreferentzia hartuta. Izan ere, Gasteizko planari esker, hiriko automobil-kopurua %27 murriztu da, karbono dioxidoko emisioak %42 gutxitu dira, joan-etorri guztien %50 oinez egiten dira eta %15 bizikletaz.

Horretarako, Donostiako mugikortasun-plan berriak, besteak beste, honako neurri hauek barne hartu beharko ditu:

• Hiriaren erdialdean ez-egoiliarren autoen sarrera erregulatzea eta mugatzea.
• Hiriaren sarreretan disuasio-aparkalekuak jartzea.
• Hiria zeharkatzen duten bidegorri-ardatz nagusiak egitea.
• Hiriko lurpeko auto-aparkalekuetan bizikletak uzteko aukera ahalbidetzea, Europako beste hiri batzuetan egiten duten bezala.

Donostian autorik gabeko eremuak sortzen baditugu eta bizikleta zein berdeguneetarako espazio gehiago uzten baditugu, ingurumenak eskertuko digu.

Etor zaitez 2019eko abenduaren 1ean, 11:00etan, Donostiako Alderdi Ederreko lorategietara.