Estatu frantsesa auzitara eraman dute aire kutsatuagatik – Airea 6

Prentsak jakinarazi du Clothilde Nonnezek demanda bat aurkeztu duela Estatu frantsesaren aurka. Emakumeak arnasteko arazoak ditu eta horiek larriagotu egiten dira, sarri gertatu ohi den bezala, Pariseko airea kutsatuta dagoenean.

Airparif webgunean, Clothildek egunero kontsultatzen du airearen kalitatea, eta ondorioztatu du berak arnasteko dituen arazoak larriagotu egiten direla kutsaduraren hazkundearekin batera. Web-orri horretan ez dira PM 2,5 partikulak, kaltegarrienak, alegia, ebaluatzen, baina kutsadura neurtzeko kabina ofizialak datu horiek txertatzen hasi dira apurka. Parisen, ordea, oraindik ez dituzte sartu. Donostian eta Euskal Herriko beste zenbait tokitan neurtu egiten dira, baina zirkulazio handia duten puntuetatik urrun dauden kabinetan, eta zirkulazioa da hain zuzen kutsadura horren eragilea. Kalapien 3 hilabete daramatzagu, sentsore mugikorren bidez, PM 2,5 partikulen neurketak egiten eta webgune honetan proiektuaren eta emaitzen berri ematen dugu.

Arnasten dugun airearen kutsadura handiagatik hirietan larriki kaltetzen dira gure osasuna eta bizi-kalitatea. Horiek defendatzeko lege-bideetara jotzea ez da oso ohikoa, baina aukera badagoela gogoan hartu behar dugu, emaitza onak eman ditzakeelako.

Urte bat baino gehiago pasa da Volkswagenek gasolioa erabiltzen duten autoetan egindako iruzurra salatu zenetik. Gero jakin izan dugu beste hainbat markek gauza bera egiten zutela eta dutela, baina…

Rien de rien! Ez da neurririk hartu eta, pixkanaka pozoitzen gaituzten bitartean, Donostian kutsadura-gertaera kezkagarri samarrak bizi ditugu baita ere. Hortaz, Frantzian gertatzen denari adi egon beharko dugu.