Zirkulazio Araudi Orokorraren berrikuntzak: aldaketa nagusiak eta balorazioa
2026ko ekainaren 24an 518/2026 Errege Dekretua onartu zen, Zirkulazio Araudi Orokorra aldatzen duena. Erreforma honek aldaketa garrantzitsuak dakartza, besteak beste, bizikleten zirkulazioari eragiten diotenak, eta 2026ko urriaren 1ean sartuko dira indarrean.
Erreformaren berrikuntza aipagarrienetako bat da, lehen aldiz, Araudiak bidearen erabiltzaile zaurgarrien kontzeptua jasotzen duela. Horrela, oinezkoen, txirrindularien, mugikortasun pertsonaleko ibilgailuen erabiltzaileen eta istripu baten aurrean zaurgarritasun handiagoa duten gainerako kolektiboen babesa indartzen da.
Kalapitik araudiaren berritasun nagusien eta hauek bizikleta eguneroko joan-etorrietan erabiltzen duten pertsonengan izango duten eraginaren laburpena prestatu dugu. Horrez gain, sartutako aldaketen inguruko gure balorazioa ere partekatzen dugu.
Aldaketa nagusiak
Kaltzadan zirkulatzea: erreiaren erditik
Bizikletaren erabilera sustatzen dugun elkarteok urteak daramatzagu hiriguneetan erreiaren erditik zirkulatzea gomendatzen. Kokapen honek segurtasuna handitzen du, ikusteko errazago egiten baigaitu, aparkatutako ibilgailuen ateek jotzeko arriskua murrizten duelako, alboko sarbideetatik ateratzen diren ibilgailuekin gatazkak saihesten dituelako eta gainerako ibilgailuek aurreratze arriskutsuak egitea zailtzen duelako.
Trafikoko Zuzendaritza Nagusiak (DGT) ere urteak daramatza gomendio hau zabaltzen, eta hiri askok mezua indartu dute erreiaren erdialdean bizikletaren piktogramak margotuz, bertatik zirkulatzea aukerarik seguruena dela adierazteko.
Zirkulazio Araudi Orokor berria indarrean sartzearekin batera, gomendio hutsa izateari utzi eta araudiaren parte izango da. 2026ko urriaren 1etik aurrera, bizikletek lehentasunez erreiaren erditik zirkulatu beharko dute hiriguneetan, urte luzez txirrindularien elkarteek eta DGTk berak defendatu duten irizpidea indartuz.
Segurtasun distantzia berriak
Ibilgailu motordunek bizikletak errespetatu beharreko segurtasun-distantzietan ere hainbat aldaketa sartzen dira. Zehazki:
- Ibilgailu motordun batek errei berean bizikleta baten atzetik zirkulatzen duenean, gutxienez bost metroko distantzia utzi beharko du.
- Noranzko bakoitzean errei bat baino gehiago duten errepideetan, ez da nahikoa izango 1,5 metroko tartea uztea. Erraiaz zeharo aldatu beharko da bizikleta bat aurreratzeko.
- Hiriarteko bideetan, bizikleta bat aurreratzean, ibilgailu motordunek abiadura-mugatik 20 km/h murriztu beharko dute abiadura.
Aldaketa txikiak kaskoaren erabileran
Oro har, kaskoaren erabilerari buruzko araudia ia ez da aldatzen. Derrigorrezkoa izaten jarraituko du hiriarteko bideetan bizikletaz dabiltzan pertsona guztientzat, eta 16 urtetik beherakoentzat, edozein motatako bidean. Hiriguneetan, berriz, erabilera gomendatzen da, baina ez da derrigorrezkoa.
Berritasun nagusia da desagertu egiten direla orain arte hiriarteko bideetan kaskoa ez erabiltzea ahalbidetzen zuten salbuespenak, hala nola igoera luzeetan edo muturreko bero-egoeretan. Araudi berria indarrean sartzen denetik aurrera, kaskoa derrigorrezkoa izango da hiriarteko bide guztietan, salbuespenik gabe.
Bizikletaz zirkulatzeko beste aldaketa batzuk
Noranzko bakoitzean bi errei edo gehiago dituzten bideetan, txirrindulariek, oro har, eskuineko erreitik zirkulatu beharko dute. Hala ere, gainerako erreiak erabili ahal izango dituzte noranzkoa aldatzeko edo segurtasun-arrazoiek hala eskatzen dutenean.
Bidegorria edo bizikletentzako bidea badago, lehentasunezko erabilera izango du, baina ez da derrigorrezkoa izango erabilera behartzen duen seinalerik ez dagoen bitartean.
Araudi berriak, gainera, trafikoa iragaztea ere arautzen eta baimentzen du (Geldirik dauden autoak aurreratzea). Beraz, semaforoetan edo auto-ilaretan geldirik edo etengabeko geldialdietan dauden ibilgailuak eskuinetik zein ezkerretik aurreratu ahal izango dituzte bizikletek.
Bizikletetan erremolkeak erabiltzea
Araudi berriak bizikletazko garraioa arautzen du eta erremolkeak eta antzeko elementuak erabiltzeko aukera aitortzen du, pertsonak, salgaiak eta animaliak garraiatzeko.
Mantendu egiten da 22 kg arteko haurrak homologatutako eserleku osagarrietan eramateko aukera.
Erremolkeetan araudiak pertsonak, salgaiak eta animaliak (azken horiek, gehienez 15 kg-koak) erremolke homologatuetan garraiatzea baimentzen du.
Berrikuntzak Mugikortasun Pertsonaleko Ibilgailuentzat (Patinete elektrikoak eta antzekoak)
Araudi berriak mugikortasun pertsonaleko ibilgailuentzat (MGI) ere hainbat aldaketa dakartza; alegia, patinete elektrikoentzat eta antzeko ibilgailuentzat. Hauek dira berritasun nagusiak:
- Kaskoa erabiltzea derrigorrezkoa izango da edozein bide eta egoeratan.
- Argiak une oro piztuta eraman beharko dira (egunez ere argiak piztuta eramateko betebeharra Araudia indarrean sartu eta urtebetera aplikatuko da).
- Gutxieneko adina 15 urtekoa izango da.
- Debekatuta egongo da autobideetan, autobiatan, zeharbideetan eta, oro har, hiriarteko bideetan zirkulatzea. Bidegorrietan edo ibilgailu motordunen zirkulazioa debekatuta dagoen bideetan erabili ahalko da.
Bizikleta eta MGIen erabilera profesionalean arau berriak
Araudi berriak betebehar berriak ezartzen dizkie bizikleta edo mugikortasun pertsonaleko ibilgailua lanerako erabiltzen duten pertsonei. 2026ko urriaren 1etik aurrera, ikusgarritasun handiko txaleko islatzailea eraman beharko dute edozein motatako bidetan zirkulatzen dutenean. Horrez gain, bizikletaz lan egiten duten pertsonek beti eraman beharko dute kaskoa, zirkulatzen duten bidea edozein dela ere. MGIen kasuan ere, gainerako erabiltzaileekin bezala, kaskoa derrigorrezkoa izango da uneoro.
Eskola-bide seguruei bultzada
Araudi berriak lehen aldiz eskola-bide seguruak aitortzen ditu. Aurrerapauso garrantzitsua da haur gehiagok eskolara oinez edo bizikletaz, modu autonomoan eta segurtasun handiagoz joateko aukera izan dezaten.
Gainera, ezartzen du ikastetxeen, ospitaleen, adinekoen zentroen, desgaitasuna duten pertsonentzako zentroen eta antzeko espazioen inguruan neurri bereziak hartu beharko direla bidearen erabiltzaile zaurgarrien segurtasuna hobetzeko. Neurri horien artean daude abiadura-murrizketak, aparkaleku-mugak eta trafikoa baretzeko bestelako jarduketak.
Bizikletazko Noranzko Bikoitza
Noranzko bakarreko eta 30 km/h edo gutxiagoko abiadura-muga duten hiri-bideetan, eta dagokion seinaleztapena eginda, udal-agintaritzak bizikletei bi noranzkoetan zirkulatzeko baimena eman ahal izango die.
Bizikletazko Noranzko bikoitza Europako herrialde askotan zabaldu den neurria da, eta frogatu da bizikleta-sarearen funtzionamendua hobetzen duela eta bizikletazko joan-etorriak errazten dituela, bide-segurtasuna arriskuan jarri gabe.
Noranzko biko zirkulazioa zer den hobeto ezagutu nahi baduzu, gure argitalpen hau irakur dezakezu: Noranzko biko zirkulazioa (DSC), zer da?
Oinezkoak hiriarteko bideetan: elementu islatzailea
Araudi berriak ezartzen du hiriarteko bideetan gauez edo ikuspen eskaseko egoeretan ibiltzen diren oinezkoek elementu islatzaile bat eraman beharko dutela.
Anbar koloreko argi keinukaria biraketetan
Araudi berriak hiriguneetako oinezkoentzako pasabideetako semaforoen funtzionamendua ere aldatzen du. Oro har, ibilgailuentzako anbar koloreko argi keinukaria ezin izango da aldi berean piztuta egon oinezkoentzako argi berdearekin.
Honek esan nahi du, oinezkoek pasatzeko argi berdea dutenean, ibilgailu motordunek argi gorria izan beharko dutela
Oinezkoen lehentasuna plataforma bakarreko kaleetan
Araudi berriak plataforma bakarreko kaleen izaera indartzen du; hau da, galtzada eta espaloia maila berean dauden eta oinezkoek zein ibilgailuek partekatzen dituzten espazioena. Bide horietan, oinezkoek lehentasuna izango dute, eta gainerako ibilgailuek zirkulazioa egoera horretara egokitu beharko dute.
Balorazioa: Argi eta itzalak
Zirkulazio Araudi Orokorraren erreformak aurrerapauso garrantzitsua dakar bizikletaz mugitzen diren pertsonen eta, oro har, bidearen erabiltzaile zaurgarrien segurtasuna hobetzeko. Berandu iritsi bada ere, txirrindularien elkarteok urte luzez aldarrikatu ditugun neurri ugari jasotzen ditu.
Aldaketarik esanguratsuena, ziurrenik, bidearen erabiltzaile zaurgarriaren kontzeptua lehen aldiz araudian txertatzea da. Horrek oinezkoen, txirrindularien eta gainerako kolektibo zaurgarrien babesa araudiaren erdigunean jartzen du.
Horrez gain, bereziki positibotzat jotzen ditugu bizikletazko noranzko bikoitzaren aitortza, erreiaren erditik zirkulatzeko lehentasunaren arautzea, hirian bizikleten atzean gutxienez bost metroko segurtasun-tartea ezartzea, aurreratzeei buruzko arau berriak eta, oro har, zirkulazioari buruzko hainbat hobekuntza. Neurri horiek guztiek segurtasuna areagotzen dute, segurtasun juridiko handiagoa ematen dute eta bizikleta eguneroko garraiobide gisa erabiltzea sustatzen dute.
Hala ere, erreformak gabezia garrantzitsuak izaten jarraitzen du. Askotan, segurtasunaren ardura erabiltzaile zaurgarriengan jartzen jarraitzen du, arrisku-faktore nagusiari, trafiko motordunari, neurriak indartu beharrean. Oinezkoak eta txirrindulariak babesteko modurik onena ez da ekipamendu gehiago ezartzea, baizik eta kale seguruagoak eta trafiko lasaiagokoak diseinatzea.
Gainera, araudiak hainbat zalantza eta hobetu beharreko alderdi uzten ditu:
Bizikletazko Noranzko Bikoitzari dagokionez erreformak aurrerapauso garrantzitsua ematen du aukera hau lehen aldiz Zirkulazio Araudi Orokorrean jasotzean. Hala ere, haren ezarpena udalen esku uzten da, eta haiek erabaki beharko dute aplikatu ala ez.
Egokiagoa izango litzateke araudiak 30 km/h-ko edo hortik beherako noranzko bakarreko kale guztietan noranzko biko zirkulazioa arau orokor gisa ezartzea, Europako herrialde askotan egiten den bezala, eta salbuespenak behar bezala arrazoi teknikoez justifikatuta daudenean bakarrik ahalbidetzea.
Erabakia udal bakoitzaren esku uzteak ezarpena oso desberdina izatea ekar dezake, eta kasu askotan oso motela edo, inexistentea izan daiteke.
Gainera, araudiak gure ustez desegokia den alderdi bat jasotzen du: kalearen zabalerak bi ibilgailuak aldi berean gurutzatzea ahalbidetzen ez duenean, bizikletak gelditu eta bidea eman beharko dio baimendutako noranzkoan doan ibilgailuari. Irtenbide hau Europako noranzko biko zirkulazioari buruzko eskuliburu tekniko nagusiek gomendatzen dutenaren aurkakoa da; izan ere, haiek bizikletari lehentasuna ematea proposatzen dute, ibilgailuen abiadura moteltzeko eta mugikortasun aktiboa sustatzeko.
Gai honi buruz sakonago hitz egin dugu gure Bizikletazko Noranzko Bikoitza argitalpenean.Anbar koloreko argi keinukariaren arauketa berria, printzipioz, aurrerapausoa da; izan ere, saihestu egiten du ibilgailuentzako seinale hau oinezkoentzako argi berdearekin batera piztuta egotea, eta horrela gatazka-egoerak murrizten dira oinezkoen pasabideetan.
Hala ere, neurriak zalantzak ere sortzen ditu. Arriskua dago udal batzuek oinezkoen itxaronaldiak luzatzea erabakitzeko, trafiko motordunaren jariakortasuna mantentzeko, aukera hau elkarguneak berrantolatzeko eta mugikortasun seguruago eta irisgarriago baten alde egiteko baliatu beharrean.
Kalapieren ustez, bidea semaforoen mendekotasuna pixkanaka murriztea, ibilgailu motordunen abiadura gutxitzea eta oinezkoen zein txirrindularien pasabideen ikusgarritasuna eta pertzepzioa hobetzea da. Horrela, oinezkoen lehentasuna modu naturalean errespetatuko duten inguruneak sustatuko dira, segurtasuna semaforoen mende soilik egon gabe.
- Zalantzak sortzen ditu, halaber, eserleku osagarrietan adingabeak garraiatzeko ezarritako 22 kg-ko mugak. Familia askorentzat motz gera daiteke, aukera hori erabilgarria den denbora murriztuz.
Egokiagoa izango litzateke arauketa malguago baten alde egitea, homologatutako euste-sistemaren gaitasunean edo fabrikatzailearen zehaztapenetan oinarrituta, pisu-muga hain zorrotza ezarri beharrean.
- Zalantzak sortzen ditu, era berean, muturreko bero-egoeretan kaskoa ez erabiltzeko salbuespena ezabatzeak. Klima-aldaketaren testuinguruan, bero-boladak gero eta ohikoagoak eta biziagoak direnez, egokiagoa izango litzateke malgutasun pixka bat mantentzea.
Bizikletaz lan egiten duten pertsonentzat ikusgarritasun handiko txaleko islatzailea nahitaez erabiltzeko betebeharra ere zalantzazkoa iruditzen zaigu. Ikusgarritasuna hobetzea egoera jakin batzuetan positiboa izan daitekeen arren, betebehar hori bizikletaz lan egiten dutenei bakarrik ezartzeak tratu desberdina dakar bide publikoan jarduten duten beste garraio-profesional batzuekiko, haiek ez baitute antzeko betekizunik.
Beste behin ere, araudiak erabiltzaile kalteberen ekipamenduan jartzen du arreta, istripuen arrazoi nagusietan jardun beharrean; hala nola, gehiegizko abiaduran, bideen diseinuan edo ibilgailu motordunen portaeran.Oso positibotzat jotzen dugu araudi berriak ikastetxeen, ospitaleen, adinekoen zentroen eta bereziki sentikorrak diren beste espazio batzuen inguruan babes-neurri espezifikoak ezartzeko beharra aitortzea. Hala ere, araudia printzipio orokor bat ezartzera mugatzen da, eta ez du zehazten zer neurri hartu behar diren, ezta nahitaez bete beharreko gutxieneko baldintzarik ezartzen ere.
Horrenbestez, arriskua dago aurrerapauso hori asmo-adierazpen hutsean geratzeko, administrazioek benetako eta eraginkorrak diren aktuazioak gauzatzen ez badituzte.
Espero dezagun administrazio eskudunek agindu hau benetan serio hartzea eta bidearen erabiltzaile zaurgarrienzat ingurune seguruagoak sortuko dituzten neurri eraginkorrak ezartzea.
Ondorio gisa, erreforma honek aurrerapauso garrantzitsua dakar bizikletaren mugikortasunerako eta bidearen erabiltzaile kalteberen babeserako, nahiz eta oraindik hobetu beharreko alderdi garrantzitsuak geratzen diren. Espero dugu berritasun hauek benetako aldaketak ekartzea gure kaleetara eta bide seguruagoak, irisgarriagoak eta pertsonengan pentsatutakoak eraikitzen laguntzea.
Informazio gehigarria
Novedades del Real Decreto 518/2026, de 24 de junio, Iberley portal de información jurídica.
Las luces y las sombras del nuevo Reglamento de Circulación de la DGT, Ciudades que caminan
Nuevas normas para CICLISTAS y VMP en 2026 (Casco, dirección prohibida, filtrado, adelantar…)
About Post Author
